Bakıda avtobus hər an partlaya bilər - TƏHLÜKƏ + VİDEO

Bakıda sərnişin avtobusu sürücülərinin özbaşınalıqları davam edir. Bu barədə admiral.az-ın redaksiyasına da etirazlar gəlib. Şikayətlərin əsasını sürücülərin mədəniyyətsizliyi, maşını təhlükəli idarə etməsi, sərnişinlərlə kobud rəftarı və içi adamla dolu olan avtobusu yanacaqdoldurma məntəqəsinə salmağı təşkil edir. Şikayətçilər bildirirlər ki, qanunla qadağan olmasına baxmayaraq, sürücülər içərisi adamla dolu maşınla yanacaqdoldurma məntəqələrinə girir. Hətta çox vaxt sürücü sərnişinlərə yanacaqdoldurma məntəqəsinə girməsi barədə xəbərdarlıq da etmir. Gecə vaxtı isə sürücü avtobusda işıqları söndürür. Səbəbsə kənardan avtobusun içinin görünməməsidir.

Ekspertlər yanacaqdoldurma məntəqələrində sərnişinlərin həyatının təhlükəyə atılması ilə bağlı hər kəsin məsuliyyət daşıdığını düşünür. "Nəqliyyatçıların hüquqi problemlərinə yardım" İctami Birliyinin rəhbəri Məzahir Rüstəmov bildirdi ki, burada birbaşa məsuliyyət sürücünün və yol polisinin üzərinə düşür: “Sərnişin avtobusunda istər 1 nəfər olsun, istər 5 nəfər olsun, istərsə, avtobus sərnişinlərlə dolu olsun, yanacaqdoldurma məntəqəsinə daxil olursa, bu qanun pozuntusudur”.

Ekspert bu problemin daha da qabardılaraq ictimailəşdirilməsinin tərəfdarıdır. Onun fikrincə, bununla həm sərnişinlər, həm yanacaqdoldurma məntəqəsinin işçiləri, həm də yaxınlıqda olan vətəndaşlar mübarizə aparmalıdır. İçərisində sərnişin olan avtobusun yanacaqdoldurma məntəqəsinə girməsi qanunla qadağandır. Sürücülərin bu hərəkətləri İnzibati Xətalar Məcəlləsinin 151.2-ci maddəsinin kobud şəkildə pozulmasıdır.

Bu tip qanun pozuntularından birinin görüntüsünü təqdim edirik: