Benzinin tərkibindən şikayət var: “Qaz vururlar”

Benzinin keyfiyyətindən şikayətlənənlərin sayı artıb. Avtosfer.az teleqraf.com-a istinadən xəbər verir ki, çoxlarının fikri üst-üstə düşür - yanacaq baha olmaqla bərabər keyfiyyətsizdir, üstəlik yanacaqdoldurma məntəqələrində sürücüləri aldadırlar. Sürücü Samir İsayev benzinin keyfiyyətindən şikayətçidir: “Son günlər görürəm, maşının benzini həm tez qurtarır, həm də mühərrikdən  səs gəlir. Ustalar da deyir ki, benzinin keyfiyyətindəndir. "Lukoil"un benzinindən razıyam, bir də qismən "Azpetrol"dan. Bu yanacaqdoldurma məntəqələrindən aldığım 10 manatlıq benzin 120 kilometrlik yola bəs edir, amma iki gün əvvəl "N-Oil"dən eyni məbləğə aldığım benzinlə 90 kilometr getməmiş qurtardı”.

Sürücü bununla bağlı hara müraciət etməli olduğunda çətinlik çəkdiyini dedi.

Cəvahir Həmidova indiyədək avtomobilinə daha çox “Azpetrol”a məxsus yanacaqdoldurma məntəqələrindən benzin vurdurduğunu deyir: “Təsadüfən indi adını xatırlamadığım bir neçə məntəqədən benzin almışam. O da ya tez qurtarıb, ya da avtomobildən səs eşitmişəm. Ona görə benzini etibar etdiyim yerlərdən alıram”.

Benzindən ən çox şikayətlənən taksi sürücüləridir. Onların ən böyük problemi aşağı oktanlı benzinin yuxarı oktan adı ilə satılmasıdır. Belə ki, oktan ədədi A 92 olan yanacaq A 95 adı ilə satılır. Yanacaqdoldurma məntəqələrdə A 93 yanacaq olmasa da, A 92 markalı benzini A 93 adı ilə də satırlar.

Lakin yanacaqdoldurma məntəqələrindən bu deyilənləri təkzib edirlər. Əlaqə saxladığımız “Merd Petrol” və "S-oil"dən bildirdilər ki, benzinin həcminin qanunsuz vasitələrlə artırılması və bir markanın o birinin əvəzinə satlılması iddiaları həqiqəti əks etdirmir: “Benzinin tərkibinə hansısa maddə qatmaq mümkün deyil. Hətta qazın vurulması da qeyri-mümkündür”.

Məntəqələrdən benzinin tez bitməsi fikrinə də aydınlıq gətirdilər. “Merd Petrol”un əməkdaşı dedi ki, yanacaqdoldurma məntəqələrinin ölçmə cihazları yüksək standartlara uyğundur və digər xarici, Avropa ölkələrində də bu cihazlardan istifadə olunur.

Qeyd edək ki, ölkədə 92 markalı benzin Heydər Əliyev adına Neftayırma Zavodunda istehsal olunur. Bu, keyfiyyətli benzin sayılır. 95 və 98 markalı benzinlər isə xaricdə istehsal edilir. Həmin benzinlərin keyfiyyəti Standartlaşdırma Metrologiya və Patent üzrə Dövlət Komitəsinin laboratoriyasında araşdırılır və o Avro-4 standartlarına uyğunluğu yoxlanılır.

Nəqliyyat məsələləri üzrə ekspert Məzahir Rüstəmov deyir ki, son günlər benzinlə bağlı şikayətlərin artmasına səbəb sahibkarlıq sahəsində aparılan yoxlamaların iki illik dayandırılmasıdır: “Bəzi sahibkarlar bu şəraitdən sui-istifadə edirlər. Belə olan təqdirdə sürücülər özləri ayıq olmalıdır, işbazları cəzalandırma üsulu onlardan gəlməlidir. Bunun üçün sürücü aldandığı təqdirdə aidiyyəti  qurumlara müraciət etməlidir. Bundan sonra sözügedən yanacaqdoldurma məntəqəsində yoxlama aparılmaqla neqativ halların qarşısını almaq olar. Bu işlə Standartlaşdırma, Metrologiya və Patent üzrə Dövlət Komitəsi məşğul olur”.

Ekspert deyir ki, komitə bütün yanacaqdoldurma məntəqələrindəki çənləri yoxlayır və üzərinə möhür vurur. Amma istehlakçıların dediyinə görə, daha çox regionlarda çənlərin plomblarının qırılması hallarına rast gəlinir ki, bu da benzinin tərkibinə müdaxilə deməkdir.