Dünya aviaşirkətlərindən qərar: Qışda on minlərlə uçuş ləğv ediləcək?

Dünya aviaşirkətləri qış üçün uçuş cədvəllərində genişmiqyaslı dəyişikliklərə və Yaxın Şərqdəki vəziyyət səbəbindən aviayanacaq qiymətləri yüksək qalacağı təqdirdə on minlərlə uçuşun ləğv edilməsinə hazırlaşırlar.

Avtosfer.az-ın xəbərinə görə, bu barədə "Financial Times" (FT) qəzeti məlumat verib.

Məlumata görə, aviadaşıyıcıların rəhbərlikləri yaxın həftələrdə nəqliyyat imkanlarının yeni iqtisadi reallıqlara uyğunlaşdırılması ilə bağlı son qərarlar verəcək.

Nəşrin məlumatına görə, Beynəlxalq Hava Nəqliyyatı Assosiasiyası (IATA) cari il üçün proqnozlarını əhəmiyyətli dərəcədə azaldıb və bildirib ki, qlobal mənfəət yarıya qədər - 43 milyard dollardan 23 milyard dollara qədər azalacaq. IATA həmçinin xəbərdarlıq edib ki, hətta qiymətlər hazırda proqnozlaşdırıldığı kimi ilin sonuna qədər azalmağa başlasa belə, sənaye əlavə olaraq 100 milyard dollar dəyərində yanacaq xərcləri ilə üzləşəcək.

"ITA Airways"in baş direktoru Yorq Eberhartın sözlərinə görə, ən pis halda İtaliya aviaşirkəti oktyabrdan aprel ayına qədər olan dövrdə uçuşların 20%-ə qədərini azaltmalı olacaq.

"Ola bilər ki, hökumətlər tərəfindən köməyə ehtiyac yaransın, hələlik bilmirik. Vəziyyət çox dəyişkəndir", - deyə o bildirib.

Öz növbəsində "Turkish Airlines" (Türk Hava Yolları) şirkətinin rəhbərliyi qeyd edib ki, əgər yanacaq qiymətləri payıza qədər düşməsə, şirkət uçuşların tezliyini azaltmalı olacaq.

"Əgər aviakerosin üçün yüksək qiymətlər iyul ayından sonra, məsələn, sentyabr ayına qədər olduğu kimi qalarsa, o zaman biz reyslərin tezliyini azaltmağa və ya hətta marşrut istiqamətlərini bağlamağa və müəyyən şəhərlərə uçuşları dayandırmağa başlayacağıq", - deyə şirkətin baş maliyyə direktoru Murat Şeker bildirib.