Radara «Ford» düşdü, cəriməni «Mercedes»ə yazdılar - FOTO

«Ford» markalı, 99 GC 967 dövlət nömrə nişanlı avtomobilin sürücüsü 60 km/saat sürət həddi tətbiq olunan ərazidə 87 ilə radara düşüb. Bununla bağlı Baş Dövlət Yol Polisi İdarəsi tərəfindən elektron protokol tərtib olunub. Lakin protokol «Ford»un yox, «Mercedes» markalı, 99 GC 962 dövlət nömrə nişanlı avtomobilin sürücüsünə göndərilib.

Görünür, ya kameralarda problem var, ya da bu protokolu zərfə qoyub ünvana göndərərkən diqqətlə baxmırlar ki, həm avtomobillərin modeli uyğun gəlmir, həm də qayda pozanın dövlət nömrə nişanı 967 olduğu halda, cərimə 962-yə göndərilib. Maraqlısı odur ki, rəqəm səhvi başadüşülən olduğu halda, fotoda «Ford» yazısı diqqətdən yayınıb. «Ford» hara, «Mercedes» hara?

İndi belə çıxır ki, sürücü məsələni aydınlaşdırmaq üçün işini-gücünü atıb DYP şöbələrinə üz tutmalı, ərizə yazmalı, vaxt itirməli və gözləməlidir ki, bu protokolu düzgün ünvana göndərsinlər. Hansı ki, bu protokolu zərfə qoyub ünvana göndərəndə diqqətlə baxmaq kifayət edər…

Elməddin