Tanışını döyərək 7 il həbs cəzası alan idmançı azadlığa buraxıldı

Məhkəmə Bakının Sabunçu rayonunda tanışını döyərək ağır xəsarətlər yetirməkdə ittiham olunan Elməddin Şıxıyevlə bağlı qərar verib.

Avtosfer.az apa-ya istinadən xəbər verir ki, Elməddin Şıxıyevin şikayəti üzrə Bakı Apellyasiya Məhkəməsində hakim Elmar Rəhimovun sədrliyi ilə məhkəmə keçirilib.

Qərara əsasən, Elməddin Şıxıyevin ittiham olunduğu Cinayət Məcəlləsinin 126.2.1, 126.2.3, 126.2.4 və 221.3-cü maddələri həmin Məcəllənin 130.1-ci (Zəruri müdafiə həddini aşmaqla qəsdən sağlamlığa ağır zərər vurma) maddəsinə tövsif edilib və ona təyin edilən cəza 1 ilə endirilib. Cəza çəkilmiş sayıldığından təqsirləndirilən şəxs məhkəmə zalından azadlığa buraxılıb.

E.Şıxıyev Bakı Ağır Cinayətlər Məhkəməsinin hökmünə əsasən 7 il müddətinə azadlıqdan məhrum edilmişdi.

Qeyd edək ki, hadisə ötən il Sabunçu rayonunun Savalan yaşayış massivində baş verib.

İttihama görə, Elməddin Şıxıyev birlikdə yaşadığı qadının qonşusu Emil Məmmədovu mübahisə zəminində küçədə döyərək ağır xəsarətlər yetirib.

Onun barəsində Cinayət Məcəlləsinin 126.2.1-ci (Qəsdən sağlamlığa ağır zərər vurma, iki və ya daha çox şəxsə qarşı, habelə təkrar və ya bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən törədildikdə), 126.2.3-ci (Qəsdən sağlamlığa ağır zərər vurma xüsusi amansızlıqla, o cümlədən zərərçəkmiş şəxsə ağır iztirablar verməklə və ya sifarişlə, habelə təqsirkar üçün aşkar surətdə köməksiz vəziyyətdə olan şəxsə qarşı törədildikdə), 126.2.4-cü (Qəsdən sağlamlığa ağır zərər vurma ümumi təhlükəli üsulla, xuliqanlıq niyyəti ilə) və 221.3 (Xuliqanlıq, silahdan və ya silah qismində istifadə olunan əşyalardan istifadə edilməklə törədildikdə) maddələri ilə cinayət işi başlanıb.

Elməddin Şıxıyevin idmançı olduğu bildirilib.