Avtobusda təhlükəli anlar: Gənclər qapıdan sallanaraq həyatlarını riskə atdı - VİDEO

Bakıda sərnişindaşıma qaydalarının kobud şəkildə pozulması qeydə alınıb.

Avtosfer.az xəbər verir ki, hadisə bir neçə gün əvvəl səhər saatlarında baş verib. Belə ki, 99-QM-548 dövlət nömrə nişanlı “Daewoo” markalı avtobusun sürücüsü hərəkət zamanı təhlükəsizlik qaydalarına əməl etməyib. Kadrlardan aydın olur ki, iki gənc oğlan avtobusun ön qapısından sallanıb, sürücü isə bu təhlükəli vəziyyətə baxmayaraq nəqliyyat vasitəsini idarə etməyə davam edir. Onlardan birinin demək olar ki, tamamilə nəqliyyat vasitəsindən kənarda qalması vəziyyətin nə dərəcədə riskli olduğunu açıq şəkildə göstərir.

Qeyd edək ki, bu cür hallarda həm sürücü, həm də sərnişinlər ciddi təhlükə ilə üz-üzə qalır. Qapısı açıq vəziyyətdə hərəkət edən avtobus qəfil əyləcləmə və ya manevr zamanı ağır xəsarətlərlə nəticələnə biləcək hadisələrə səbəb ola bilər.

Xatırladaq ki, sərnişindaşıma qaydalarına əsasən, sürücü yalnız bütün qapılar bağlandıqdan sonra hərəkətə başlamalı, sərnişinlərin təhlükəsizliyini tam təmin etməlidir.

Nərmin