Bakıda 50 nömrəli marşrut avtobuslarının son dayanacağı yenidən müəyyən olunacaq? - VİDEO

50 nömrəli marşrut avtobusunun boş vəziyyətdə dayanacaqda gözləməsindən dolayı yaranan narazılıq daşıyıcı şirkətlə müzakirə olunub.

Avtosfer.az xəbər verir ki, bu barədə Oxu.Az-a Azərbaycan Yerüstü Nəqliyyat Agentliyindən (AYNA) məlumat verilib.

Bildirilib ki, daşıyıcıya avtobusların hərəkət intervalına və müəyyən edilmiş iş qrafikinə uyğun tənzimlənməsi, son dayanacaq məntəqəsində maksimum bir və ya iki ədəd avtobusun dayanması barədə müvafiq tapşırıqlar verilib:

"Eyni zamanda, marşrutun son dayanacağının yenidən müəyyənləşdirilməsi ilə bağlı təhlil aparılacaq".

***

Sakinlər 50 nömrəli marşrut avtobusunun boş vəziyyətdə dayanacaqda gözləməsindən narazıdırlar.

Şikayət ünvanlayan vətəndaşlar bildiriblər ki, metronun "Neftçilər" stansiyasından Qara Qarayev prospekti istiqamətinə gedən yolda yerləşən dayanacaqda bir neçə 50 nömrəli marşrut avtobusu dayanır.

Sakinlərin sözlərinə görə, boş avtobusların dayanması sərnişin daşımaq üçün dayanacaqda saxlamaq istəyən sürücülərə çətinlik yaradır:

"Digər avtobus sürücüləri dayanacaq dolu olduğu üçün ikinci və üçüncü zolaqda saxlamaq məcburiyyətində qalır. Sərnişinlər də həmin zolağa çıxaraq avtobusa minirlər. Bu yol hərəkəti qaydalarının pozulmasıdır, sərnişinlərin də həyatını təhlükəyə atır".

Məsələ ilə bağlı aidiyyəti üzrə sorğu ünvanlanıb.