“Bəzi sürücülər “kim qabağa düşdü, düşdü” prinsip ilə hərəkət edir” – EKSPERTDƏN AÇIQLAMA - FOTO

Svetofor işləmədikdə və yol nişanlarının da olmadığı hallarda sürücülər “Yol hərəkəti haqqında” qanunun əsas prinsiplərinə əsaslanmalıdırlar. Bu cür vəziyyətlərdə xüsusi olaraq qeyd olunur ki, sürücülər yolayrıcında sağdan gələn nəqliyyat vasitəsinə yol verməlidirlər. Yəni heç bir nişan və ya svetofor yoxdursa, həmin ərazidə kiminsə sağında olan sürücü dayanmalı və sağdan gələnə yol verməlidir. Bu, yol hərəkətinin nizamlı və təhlükəsiz şəkildə davam etməsi üçün vacib bir qaydadır.

Ancaq təəssüf ki, bu prinsipə ölkəmizdə çox da əməl olunmur. Bəzi sürücülər bu qaydanı ümumiyyətlə bilmirlər, bəziləri isə bilə-bilə ona əməl etmirlər. Onların düşüncəsində sanki qaydalar deyil, şəxsi üstünlük və sürət əsas rol oynayır. Nəticədə, sürücülər bir-birini nəzərə almadan, qarşı tərəfin haqlı olub-olmadığını düşünmədən öz yoluna davam etməyə çalışır. Belə davranışlar isə adətən yollarda anlaşılmazlıqlara, mübahisələrə, hətta qəzalara və tıxaclara səbəb olur. Bəzən elə vəziyyət yaranır ki, kəsişmədə heç kim yol vermək istəmir, hamı bir-birinə mane olur və sonda hərəkət tam dayanır. Bu isə həm vaxt itkisinə, həm də yol hərəkəti mədəniyyətinə zərbə vurur.

Bəs belə vəziyyətlərdə yol hərəkəti qaydasını kim müəyyən edir və qayda pozanlar haqlı rolda ola bilərmi?

Mövzu ilə bağlı nəqliyyat eksperti Elməddin Muradlı Avtosfer.az-a açıqlamasında bildirib ki, "Yol hərəkəti haqqında" qanunun tələblərinə görə, svetofor işləmədikdə sürücülər yol nişanlarını əsas tutmalıdırlar:

“Yol nişanları da yoxdursa, yol ayrıclarında sağdan gələn nəqliyyat vasitələrinin sürücülərinə yol verməlidirlər və ona uyğun davranmalıdırlar. Amma təəssüf ki, bizdə bu qaydaları çoxları bilmir və yaxud da bilib əməl etmək istəmir. Sanki “kim qabağa düşdü, düşdü” prinsipi ilə hərəkət etməyə çalışırlar. Bu da yol-nəqliyyat hadisələrinə, tıxaclara səbəb olur”.

Eltac Zülfüqaroğlu