Bu küçədə sürücülər dayanma-durma qaydasına əməl etmirlər: Piyadalar təhlükə ilə üz-üzə qalıb - VİDEO

Paytaxtın mərkəzi küçələrindən biri olan Mehdi Hüseyn küçəsində dayanma-durma qaydalarının pozulması artıq adi hal alıb. Avtosfer.az-ın qaynar xəttinə göndərilən videogörüntü də bunu təsdiqləyir.

Kadrlardan göründüyü kimi, Niyazi küçəsi ilə kəsişmədə avtomobillər döngə boyunca park edilib. Belə vəziyyət nəqliyyatın hərəkətini çətinləşdirməklə yanaşı, həm də qəza riskini artırır. Daha narahatedici məqam isə sürücülərin piyada keçidlərinin qarşısında dayanmasıdır. Bu səbəbdən piyada keçidləri görünməz hala gəlir və piyadalar yolu keçərkən ciddi təhlükə ilə üzləşirlər. Avtomobilin qarşısından yola çıxan piyadalar dəfələrlə təhlükə ilə üz-üzə qalıblar. Hərəkətdə olan sürücülər onları son anda gördükləri üçün qəfildən dayanırlar ki, bu da arxadan gələn avtomobillərə də təhlükə yaradır.

Qanunvericiliyə görə, istər yolayrıcılarında, istərsə də piyada keçidlərində dayanma-durma qadağandır. Bu yerlərə 5 metr məsafədən yaxın dayanmaq inzibati cərimə ilə nəticələnə bilər.

Fərid