Bu məktəbin qarşısında azyaşlıların həyatı təhlükə altındadır - VİDEO

Bakıda məktəb şagirdlərinin və onların valideynlərinin yol hərəkəti qaydalarına əməl etməməsi ciddi təhlükəyə çevrilib. Avtosfer.az xəbər verir ki, bu problem paytaxtın 28 May küçəsində yerləşən 23 saylı orta məktəbin qarşısında müşahidə olunur.
Hər gün dərs saatlarının bitməsindən sonra məktəbdən çıxan şagirdlər yolu müəyyən olunmayan yerlərdən keçməyə üstünlük verirlər. Halbuki, 30-40 metr qarşıda nizamlanan piyada keçidi mövcuddur. Lakin valideynlər uşaqlarını təhlükəsiz keçiddən keçirmək əvəzinə, onların qaydaları pozmasına şərait yaradaraq pis vərdiş formalaşdırırlar. Hətta bir çox valideynlər maşınların arasından övladlarını keçirməyə çalışır və onları yolun ortasında avtomobilə mindirirlər. Bu isə həm uşaqların, həm də sürücülərin həyatı üçün ciddi təhlükə yaradır.
Sözügedən ərazidə yolun sol zolağı velosipedlərin ikitərəfli hərəkəti üçün nəzərdə tutulub. Bu isə o deməkdir ki, qəfil yola çıxan uşaqlar təkcə avtomobillər üçün deyil, həm də velosipedçilər üçün təhlükə yaradırlar. Velosiped sürən şəxslər üçün belə gözlənilməz hallarla qarşılaşmaq qəza riskini artırır. Əksər hallarda valideynlər bu təhlükənin fərqində olmurlar və ya ona biganə yanaşırlar. Halbuki, uşaqlara düzgün yol hərəkəti vərdişlərinin aşılanması valideynlərin əsas vəzifələrindən biridir.

Nərmin