Əks yola çıxan sürücü maşınların üzərinə sürdü - VİDEO (Yenilənib)

"Abşeron rayonu Saray qəsəbəsi ərazisində əks yola çıxaraq hərəkət iştirakçılarına təhlükə yaradan nəqliyyat vasitəsinin sürücüsünün kimliyi müəyyən olunub". Bunu Oxu.az-a açıqlamasında Daxili İşlər Nazirliyinin Baş Dövlət Yol Polisi İdarəsinin rəsmisi, polis polkovnik-leytenantı Mübariz Ağayev deyib. O qeyd edib ki, hadisə Saray qəsəbəsi, Novruz Aslanov küçəsində qeydə alınıb. "Sumqayıt şəhər sakini, 77-PZ-658 dövlət qeydiyyat nişanlı "Khazar" markalı avtomobilin sürücüsü İsaq Elman oğlu Əliyev müvafiq nişanlanma xətlərinin tələbini pozaraq idarə etdiyi nəqliyyat vasitəsini, tam olaraq əks istiqamətli nəqliyyat axınının hərəkət zolağına keçirərək hərəkət etdiyinə görə, barəsində inzibati tənbehvermə haqqında qərar çıxarılıb. Sürücü İnzibati Xətalar Məcəlləsinin 327.4-cü-ci maddəsinə əsasən 150 manat, 4 bal məbləğində cərimə olunub. O, yaşadığı evə yaxın ərazidə qayda pozduğunu etiraf edib və etdiyi hərəkətdən peşman olduğunu bildirib", - deyə idarə rəsmisi bildirilib.

M.Ağayev eyni zamanda sürücülərə də müraciət ünvanlayıb və qeyd edib ki, bir daha sürücülərdən xahiş edirik ki, bu cür kobud qayda pozuntularına yol verib həm özlərinin, həm də başqalarının həyatını təhlükəyə atmasınlar.

***

Saray qəsəbəsində qayda pozan sürücünün videosu sosial şəbəkədə yayılıb. Avtosfer.az xəbər verir ki, hadisə avqustun 19-da, Heydər Əliyev prospektində baş verib.

Belə ki, "Khazar" markalı avtomobilin sürücüsü yolun əks tərəfinə keçərək yüksək sürətlə axına qarşı hərəkət edib. Yolda ayırıcı zolağın, dəmir məhəccərin olmadığı halda sürücünün əks yolla hərəkət etməsi sosial şəbəkə izləyicilərini qəzəbləndirib. İki zolaqlı yolda sürücünün belə hərəkət etməsi heç cür başa düşülən deyil.

Qeyd edək ki, bu əmələ görə, sürücü İnzibati Xətalar Məcəlləsinin 327.4-cü maddəsilə 4 bal 150 manat məbləğində cərimə oluna bilər.

Fərid