Əks yola çıxan sürücü qarşıdan gələn avtomobilə qəza şəraiti yaratdı - VİDEO

Xırdalan dairəsindən Binəqədi Mədəniyyət Mərkəzi istiqamətində gedən yolda kobud qayda pozan sürücü kameraya düşüb.

Avtosfer.az-ın məlumatına görə, hadisə iyulun 20-də saat 20:18 radələrində qeydə alınıb.

Belə ki, 14-HC-014 dövlət qeydiyyat nişanlı “Jeep” markalı avtomobilin sürücüsü yolda yaranmış nəqliyyat sıxlığında gözləməmək məqsədilə əks hərəkət zolağına çıxaraq irəliləyib. Bu zaman ara küçədən əsas yola daxil olan avtomobilin hərəkətinə maneə yaradıb və qəza şəraiti formalaşdırıb. Qarşı tərəfdəki sürücü operativ manevr edərək avtomobilini yolun sağına yönəltməklə toqquşmanın qarşısını son anda ala bilib.

Görüntülərdən də aydın olur ki, sürücünün bir neçə saniyə vaxt qazanmaq cəhdi qəza ilə nəticələnə bilərdi. Halbuki, yolun əks istiqamətinə çıxmaq yalnız qanunla müəyyən edilmiş istisna hallarda mümkündür. Digər hallarda bu hərəkət inzibati məsuliyyət yaradan kobud qayda pozuntusu hesab edilir.

Nərmin