Fransa polisi dönər yeyən azərbaycanlını cərimələdi

Bu hadisə Azərbaycan əsilli Almaniya vətəndaşının başına gəlib. Onu şəxsən tanısam da, etik səbəbdən adını çəkmirəm.

Əhvalat belə olub: bu günlərdə məzuniyyətdən istifadə edən ər-arvad avtomobillə Fransanı gəzmək fikrinə düşüblər. Elzas regionunu gəzən cütlük geri qayıdarkən yolüstü Strasburqdakı dönərxanalardan birindən dönər alıb. Ər vaxt itirməmək üçün yeyə-yeyə getmək qərarına gəlib. Lakin, Fransa polisi buna mane olub. Elə şəhəri tərk etmədən jandarmlar azərbaycanlı sürücünü saxlayaraq ona 35 avro cərimə yazıblar. Qərar onların təəccübünə səbəb olsa da, məbləğ kiçik olduğu üçün etiraz etməyiblər.

Almaniyaya qayıdan şəxs məsələnin qanuni olub-olmadığını vəkillə müzakirə edib. Hüquqşünas burada heç bir qayda pozuntusu olmadığını bildirib və cərimənin dəbbə pulu gəlmədən ödənilməsini məsləhət görüb. 

Bəs Fransa polisinin tətbiq etdiyi cərimə nə dərəcədə əsaslıdır?

Avtosfer.az xəbər verir ki, Fransanın Yol Hərəkəti Məcəlləsində sükan arxasında qida qəbul etməyə görə birbaşa cəza nəzərdə tutulmur. Lakin həmin məcəllənin 412-ci maddəsinə görə sürücünün manevr imkanlarını məhdudlaşdıran hərəkətlər, başqalarına qarşı ehtiyatsız və ya ədəbsiz davranışlar inzibati xəta predmetidir. Qanun keşikçiləri bu maddədən çıxış edərək sükan arxasında yeyib-içən, yandakı oturacaqda nə isə axtaran, yaxud bəzənən sürücüləri cərimələyirlər. Cərimənin miqdarı xətanın dərəcəsinə görə 35 və 135 avro ola bilər. Fransa polisinin azərbaycanlı sürücünü cərimələməsində heç bir qanunsuzluq yoxdur. Sürücü Almaniya vətəndaşı olaraq cərimədən qaça bilməyəcək. 
Sözügedən qanunun 412-6-cı maddəsi yetkinlik yaşına çatmış şəxslərin avtomobildə siqaret çəkməsinə icazə verir. Lakin salonda uşaqlar olduğu təqdirdə siqaret çəkən şəxs 750 avroyadək cərimə edilə bilər.

Vüqar