Küçədə nişanlar düzgün quraşdırılmayıb? - “Dayanma icazəsi o zaman olar ki...”

Paytaxtda fəaliyyət göstərən taksiçilərinin bir çoxu müştəriləri mindirib-düşürərkən tez-tez cərimələndiklərini deyir. Sürücülərin sözlərinə görə, bu onlara həm maddi, həm də vaxt baxımından ciddi zərər vurur. Onlar digər nəqliyyat vasitələrindən fərqli olaraq, taksilərin bu qadağadan azad edilməsini istəyirlər.

Mövzu ilə bağlı nəqliyyat eksperti Rövşən Həsənov bildirib ki, taksi sürücüləri 3.27 və 3.28 nişanlarını səhv salmamalıdır:

“Dayanma-durmanı qadağan edən 3.27 və 3.28 nişanların fərqi ondan ibarədir ki, əgər 3.28 nişanının təsir zonası altında nəqliyyat vasitəsinə yük doldurub-boşaltmaq, sərnişin mindirib-düşürməyə icazə verirsə, 3.27 nişanı hər bir halda bunları qadağan edir. Yalnız nəqliyyat vasitəsini idarə edən sürücünün səhhətində problem yaranarsa, yaxud avtomobilin özündə texniki nasazlıq baş verərsə, istisna hal qüvvəyə minir.

Rusiya qanunvericiliyini nümunə çəksək, 3.27 nişanının təsiri altında olan zonalarda yalnız taksilər üçün dayanma icazəsi o zaman olar ki, həmin zonada taksilər üçün parkinq yeri mövcud olsun. Yalnız bu halda taksilər üçün 3.27 nişanının təsiri qüvvədən düşür”. 

Ekspertin sözlərinə görə, paytaxt küçələrində bu nişanlar ardıcıl quraşdırılıb və bu düzgün deyil:

“Bu, taksi sürücülərinin mütəmadi olaraq cərimələnməsi ilə nəticələnir. Həmin nişanlar quraşdırılan zaman mütləq alternativləri, yəni parkinqlər və parkinqin isə bir neçə növü olmalıdır. Ən azı qiymət baxımından, onlar həm pullu, həm də pulsuz olmalıdır. Xüsusilə, müvvəqqəti saxlama üçün pulsuz parkinqlər nəzərdə tutulmalıdır”.(yeni.sabah)