Maşını düzgün park etməmisən? – CƏBHƏYƏ GET

2024-cü ildə “Axmat-Çeçenistan” polku Ukraynanın hücumu zamanı Kursk vilayətini döyüşsüz tərk etdikdən sonra Ramzan Kadırova etimad azalıb.

Avtosfer.az “Novaya Qazeta” nəşrinə istinadla xəbər verir ki, artıq bir müddətdir Çeçenistan rəhbəri etimadı doğrultmaq üçün müəyyən yollara əl atır. Bunlardan biri də “xüsusi əməliyyat” (Ukrayna müharibəsinin Rusiyada icazə verilən yeganə rəsmi adı – müəl.) üçün “könüllü” toplamaqdır. Bunun da amarqlı üsulları var. 

Qəzet yazır ki, Kadırov hələ 2024-cü ilin sonlarında “Telegram”da məsələyə münasibət bildirib. Başçı güc strukturları ilə keçirdiyi müşavirədə “problemli gəncləri” müharibəyə göndərməyi tələb edib: “biz qayda pozanları dəfələrlə xəbərdar etmişik. İndi isə söhbət qısa olacaq. Ya qaydaya əməl et, ya da maksimal müddətdə həbsxanaya get. Ya da müqavilə bağla və cəsarətini düşmənə göstər”.

Bu məsələlərə nəzarət deputat Adam Dlimxanova həvalə edilib və müəyyən nəticələr də artıq var. Polis idarələrinə hər ay 25-50 nəfər “könüllü” taparaq müharibəyə göndərmək tapşırılıb. Belə “könüllüləri” isə Çeçenistanda tapmaq çox asandır: avtomobili düzgün park etməyən, texniki baxışdan keçməyən və ya sığortasız nəqliyyat vasitəsi idarə edənlərin, ya da küçədə kiminləsə mübahisə edənin “könüllü” olması bir neçə dəqiqəlik işdir.

Vüqar