Maşının nömrəsini bana əllə yazan taksi sürücüsü - Cəriməsi nə qədərdir? - VİDEO

Azərbaycanda qeyri-adi bir avtomobil nömrəsi görənlərin diqqətini çəkib. 

Avtosfer.az xəbər verir ki, “VAZ” markalı avtomobilin arxa tərəfinə, standart metal nömrə lövhəsinin əvəzinə, maşının banına əllə 90-CT-358 nömrəsi yazılıb. Qanunvericiliyə görə bu lövhədə avtomobilin qeydiyyat nömrəsi rəsmi qaydada həkk olunmalıdır.

Bu görüntü sosial şəbəkələrdə maraq doğurub, avtomobil sahiblərinin belə qeyri-adi üsullara əl atması həm təəccüb, həm də tənqid obyektinə çevrilib.

Qeyd edək ki, İnzibati Xətalar Məcəlləsinin 342.7-ci maddəsinə əsasən, Dövlət qeydiyyat nişanları və ya onlardan birinin olmamasına, saxta və ya başqa nəqliyyat vasitələrinə verilmiş dövlət qeydiyyat nişanları ilə nəqliyyat vasitələrini idarə etməyə görə sürücülər 100 manat 4 balla cərimələnir.

Avtosfer.az-ın əldə etiyi məlumata görə, artıq həmin nəqliyyat vasitəsi yol polisi tərəfindən aşkar edilərək saxlanılıb və müvəqqəti mühafizə olunan duracağa yerləşdirilib. Sürücü barəsində isə qanunda nəzərdə tutulan qaydada inzibati tənbeh tədbiri görülüb.

Eltac Zülfüqaroğlu