Mədəniyyətsiz sürücü maşını ortalıqda saxlayıb başqalarının yolunu bağladı – VİDEO

Paytaxtda yerləşən Mərkəzi Klinik xəstaxanın ödənişli parkinqində sürücülərdən birinin üzləşdiyi vəziyyət narazılığa səbəb olub.

Avtosfer.az xəbər verir ki, hadisə ilə bağlı məlumat verən sürücünün sözlərinə görə, o, avtomobilini parkinq ərazisində qaydalara uyğun şəkildə saxlayıb. Lakin geri qayıdaraq avtomobilinə minmək istədikdə çıxışının başqa bir nəqliyyat vasitəsi tərəfindən bağlandığını görüb.

Belə ki, "Mercedes" markalı, 88-BG-091 nömrə nişanlı avtomobil onun nəqliyyat vasitəsinin arxasında dayanaraq hərəkət etməsinə mane olub.

Sürücü bildirib ki, 50 dəqiqədən artıqdır avtomobilin sahibini gözləyir. Onun sözlərinə görə, məsələ ilə bağlı parkinqdə fəaliyyət göstərən mühafizə xidmətinə də məlumat verilib, lakin həmin müddət ərzində avtomobilin sürücüsünü tapmaq mümkün olmayıb.

Hadisədən narazılığını ifadə edən sürücü qeyd edib ki, parkinq ərazisində boş yerlər olduğu halda digər avtomobilin məhz onun nəqliyyat vasitəsinin qarşısını kəsəcək şəkildə saxlanılması anlaşılan deyil.

Qeyd edək ki, nəqliyyat vasitəsinin digər avtomobilin hərəkətinə mane olacaq şəkildə saxlanılması sürücülər arasında tez-tez narazılıq yaradan hallardan biridir və bu cür davranışlar həm vaxt itkisinə, həm də nəqliyyatın hərəkətində problemlərə səbəb olur.

Eltac Zülfüqaroğlu