Qırmızı işıqda özünü maşının qarşısına atdı və sürücünü günahlandırdı - VİDEO

Bakıda piyadaların qaydalara riayət etməməsi xüsusilə müəyyən yerlərdə daha qabarıq şəkildə müşahidə olunur. Bu kimi halların ən çox qeydə alındığı yerlərdən biri də Bəxtiyar Vahabzadə küçəsidir. Hüseyn Cavid prospekti ilə kəsişən bu ərazidə piyadaların qayda pozuntusu adi hal alıb. Svetoforun siqnallarına məhəl qoymadan yolu keçən piyadalar təkcə öz həyatlarını təhlükəyə atmırlar, həm də avtomobillərin hərəkətinə mane olaraq nəqliyyat axınında ciddi problemlər yaradırlar. Xüsusilə pik saatlarda bu cür davranışlar tıxacların yaranmasına, habelə qəza riskinin artmasına səbəb olur.

Mövcud vəziyyət bir çox müşahidəçilərin diqqətindən yayınmayıb. Qeydə alınmış bir videoda yolu qırmızı işıqda keçən bir qadının davranışı bu problemin ciddiliyini bir daha ortaya qoyur. Belə ki, həmin qadın avtomobilin qarşısına qəfil çıxaraq təhlükəli vəziyyət yaradıb. Avtomobil sürücüsünün dayanmağa çalışdığı anda, qadın özünü müdafiə etmək məqsədilə əlini qaldıraraq sürücüyə "üstümə niyə sürürsən?" məzmunlu jest edib. Bu hal, bir tərəfdən piyadaların məsuliyyətsizliyini, digər tərəfdən isə yol hərəkəti qaydalarının kifayət qədər nəzarət edilmədiyini göstərir.

Həmin ərazinin xüsusiyyətlərindən biri də yaxınlıqda yerləşən təhsil müəssisələridir. Nəticədə, gün ərzində yüzlərlə tələbə və digər piyadalar bu küçədən keçərək oxşar davranışlar nümayiş etdirirlər. Bu isə həm onların, həm də sürücülərin həyatı üçün ciddi təhlükə yaradır.

Nərmin