Sərxoş halda yaxalanan gənc sürücü yol polisini kapotda sürüdü - FOTO

Sərxoş sürücü onu saxlayan yol polisi əməkdaşını avtomobilinin kapotunda sürüyüb.

Avtosfer.az xəbər verir ki, hadisə aprelin 23-də axşam saatlarında Türkiyənin İzmir şəhərində baş verib.

Belə ki, İzmir Nəqliyyat Nəzarət Şöbə Müdirliyi əməkdaşları Buca rayonunda reyd zamanı 19 yaşlı S.Ş. idarə etdiyi 35-BSH-971 dövlət nömrə nişanlı avtomobili saxlayıb.

Sərxoşluq testindən keçəcəyini anlayan sürücü qaçmaq istəyərkən, yol polisi əməkdaşı avtomobilin kapotundan yapışıb. Avtomobilin sürücüsü polis əməkdaşını o vəziyyətdə təxminən 500 metr sürüyüb. Bu cür yoluna davam edən sürücünün qarşısını isə başqa bir avtomobil kəsib və o, polis qrupları tərəfindən nəzarət altına alınıb.

Hadisə nəticəsində yaralanan polis əməkdaşı Seyfi Dəmirsoy xəstəxanaya aparılıb.

Aparılan müayinə zamanı sürücü S.Ş.-nin 1,22 promil sərxoş olduğu müəyyən olunub.

Faktla bağlı araşdırma aparılır.

Namiq Musayev