Sumqayıtda 7 nömrəli avtobus sürücüləri marşrutları ilə hərəkət etmir - FOTO

Sumqayıtda avtobus sürücülərinin özbaşınalıqları artıq şəhər əhalisinin ciddi narazılığı ilə üzləşib.

Avtosfer.az xəbər verir ki, artıq bir müddətdir ki, Sumqayıt şəhərinin əsas nəqliyyat yükünü daşıyan 7 nömrəli marşrut avtobusunun sürücüləri qaydalara riayət etmir. Belə ki, şəhər avtovağzalı ilə Xəzər bağlar massivi və 13-cü mikrorayonu birləşdirən marşrut xətti üzrə hərəkət edən 7 nömrəli avtobusların sürücüləri öz xətləri üzrə hərəkətdən yayınır.

Bakı küçəsi ilə irəliləyib avtovağzalın qarşısındakı dayanacaqda avtobusu saxlamalı olan sürücülər xətdən çıxaraq sağa, yəni Sülh prospektinə dönür və “7 nəsil” heykəlinin qarşısından Heydər Əliyev prospektinə - sola dönərək son dayanacağa yaxınlaşırlar. Bununla da daha çox relsə çıxaraq günlük planlarını yüksəldə bilirlər. Avtovağzala, oradan da Bakıya üz tutmağa çalışanlar isə bu sürücülərin ucbatından uzun məsafəni piyada qət etməli olurlar. Sosial şəbəkələrdə paylaşdığı fotolarda vətəndaş bildirir ki, sürücülər, eləcə də onlara nəzarət edən qurumlar hər dəfə avtovağzalın qarşısındakı tıxacı bəhanə gətirir, lakin qeyd edilən saatlarda həmin ərazidə heç bir tıxac olmur.

Sakinlər artıq Bakı və Gəncədə ictimai nəqliyyat sahəsində yaradılan şəraitin Sumqayıtda da qurulmasını, “BakuBus” avtobuslarının gətirilməsini tələb edir. Bildirirlər ki, mövcud şəraitdə kart sisteminin olmaması, daha əvvəl gətirilib işə yaramaması, sürücülərin özbaşınalıqları, bir-birlərilə yollarda yarışmaları narahatlıq yaradır.

Səfər