Sürücü tuneldən əks istiqamətdə çıxdı, sərnişin isə ona haqq qazandırdı - VİDEO

Paytaxtın “Koroğlu” metrosunun yaxınlığında qayda pozan sürücü kameraya düşüb.

Avtosfer.az-ın məlumatına görə, hadisə iyunun 18-də saat 09:00 radələrində “Alov” parkı istiqamətindən Böyükşor bulvarına düşən yolda qeydə alınıb. Kadrlardan görünür ki, 77-EB-338 dövlət qeydiyyat nişanlı “Toyota” markalı avtomobilin sürücüsü tunel çıxışında əks istiqamətə daxil olaraq hərəkət edib və qarşıdan gələn nəqliyyat vasitəsinə qəza şəraiti yaradıb.

Daha sonra avtomobildə olan sərnişin sürücüyə yol nişanlanma xəttinin olmadığı barədə irad bildirib. Bir müddət sonra isə sürücü manevr edərək yolun sağ zolağına qayıdıb və hərəkətini davam etdirib.

Qeyd edək ki, yol nişanlanma xətlərinin olmaması əks istiqamətdə hərəkət üçün əsas yaratmır. Sürücülər yolun hərəkət istiqamətinə uyğun sağ tərəfi ilə hərəkət etməli, sol hissənin əks istiqamətli yol olduğunu nəzərə almalıdırlar. Bu tələblərə əməl olunmaması inzibati məsuliyyət yaradır və yol-nəqliyyat hadisəsi riskini artırır.

Nərmin