Tələsən sürücü gah sağdan ötdü, gah da "ara işləyib" təhlükə yaratdı - VİDEO

Bakıda yol hərəkəti qaydalarını kobud şəkildə pozan sürücü təhlükəli anlar yaşadıb. Avtosfer.az xəbər verir ki, hadisə noyabrın 25-də, paytaxtın İnşaatçılar prospektində qeydə alınıb.

Belə ki, 90-XY-510 qeydiyyat nişanlı "Mercedes" markalı avtomobilin sürücüsü öncə sağdan ötmə əməliyyatı edərək həm qayda pozub, həm də ötdüyü avtomobilin sürücüsünə təhlükə yaradıb.

O, bununla kifayətlənməyərək qarşıda daha da kobud qayda pozuntuları törətməyə başlayıb. Lev Landau küçəsinə çatan zaman sürücü tıxaca düşdüyü üçün sərt manevrlər edərək gah sağa, gah da sola yerdəyişmələr edib. Bu zaman digər sürücülərə təhlükəli anlar yaşadıb. Sonda yenidən ötmə qaydasını pozan sürücü yüksək sürətlə hərəkətinə davam edib.

Videogörüntünü qeydə alan sürücü normal hərəkət edərək həmin avtomobili Məmməd Rahim küçəsilə kəsişmədə ötüb keçib.

Biz hər zaman qeyd etmişik və bu videoda bir daha təsdiq təsdiqini tapır ki, tələsmək sürücüyə vaxt qazandırmır. Əksinə həm təhlükə ilə üz-üzə qoyur, həm də sürücünün məsuliyyətə cəlb edilməsi ilə nəticələnir.

Könül Rauf