Xanım təlimçiyə təpik atan “Range Rover” sürücüsü saxlanıldı - FOTO - VİDEO

Bakıda qayda pozuntusu edən sürücünün qanunlara və etik davranışa zidd hərəkətləri kameraya düşüb. Hadisə aprelin 20-də paytaxtın Dərnəgül mübadilə məntəqəsinin yaxınlığında baş verib. Bu barədə sürücülük təlimçisi Arzu Babazadə Avtosfer.az-a məlumat verib.

Təlimçi bildirib ki, həmin gün tələbəsi ilə dərs keçərkən “77-XU-015” dövlət nömrə nişanlı Range Rover markalı avtomobilin sürücüsü dayanma-durma qaydasını pozduğu üçün ona irad bildirib. Sürücü “pulum var, cəriməsini ödəyəcəm” deyərək, öz hərəkətinə haqq qazandırmağa çalışıb.

Hadisənin davamında isə təlim zamanı geriyə hərəkət manevri öyrədilən zaman həmin sürücü avtomobildən düşərək Arzu Babazadənin idarə etdiyi təlim maşınına təpik atıb və onun ünvanına nalayiq ifadələr işlədib. Təlimçi bu hərəkətə etiraz etdikdə, sürücü yüksək sürətlə ərazidən uzaqlaşıb.

Arzu Babazadə baş vermiş hadisə ilə əlaqədar Binəqədi Rayon Polis İdarəsinin 5-ci Polis Bölməsinə ərizə ilə şikayət edib. Məsələ ilə bağlı polis bölməsində araşdırma aparılıb və artıq sürücü saxlanılıb. Onun barəsində müvafiq qanunvericiliyə uyğun tədbir görüləcək.

Təlimçi xanım daha sonra öz hesabında video paylaşaraq Avtosfer.az-a, DİN rəhbərliyinə və əməkdaşlarına məsələdə göstərdikləri həssas yanaşmaya görə təşəkkürünü bildirib.

Fidan