Avtobus sürücüsü sükan arxasında vəfat etdi: Sərnişin qəzanın qarşısını aldı - VİDEO

Türkiyənin Qaziantep şəhərində xüsusi marşrut avtobusu sürücüsü Ahmet Kılınç (60) sükan arxasında olarkən qəfil ürəktutması keçirərək vəfat edib.

Avtosfer.az türk mediasına istinadən xəbər verir ki, hadisə zamanı avtobusun idarəetməsi itirilib, lakin sərnişinlərdən biri vaxtında müdaxilə edərək nəqliyyat vasitəsini dayandırıb və mümkün faciənin qarşısını alıb.

Ətrafdakıların çağırışı ilə hadisə yerinə təcili tibbi yardım və polis əməkdaşları cəlb olunub. Təcili yardım əməkdaşlarının ilkin yoxlamasından sonra sürücü Ahmet Kılınçın hadisə yerində vəfat etdiyi müəyyən olunub.

Hadisə anı avtobusun təhlükəsizlik kamerası tərəfindən qeydə alınıb. Görüntülərdə Ahmet Kılınçın bir anda yerə yıxıldığı, avtobusun istiqamətdən çıxdığı və sərnişinin vaxtında müdaxiləsi ilə nəqliyyat vasitəsinin dayandırıldığı açıq şəkildə görünür.

Həmçinin, hadisə zamanı digər sərnişinlərin yaşadığı panika da kadrlara əks olunub.

Faktla bağlı araşdırma aparılır.(sonxeber.az)