İsmayıllıda ailə faciəsi - 19 yaşlı qızla 3 yaşlı körpə öldü - YENİLƏNİB

İsmayıllı rayonunda baş verən ölümlə nəticələnən ağır avtomobil qəzası ilə bağlı təfərrüat məlum olub.

Avtosfer.az oxu.az-a istinadən xəbər verir ki, qəzaya düşən ailə Bakıdan Qəbələ rayonuna gedirmiş.

VAZ-21015 markalı avtomobilin sürücüsü Nicat Əsgərov bir neçə ay əvvəl ailəsindən ayrılıb və həmkəndlisi Lamiyə Qurbanova ilə qeyri-rəsmi ər-arvad münasibətində yaşayırmış. Əslən Qəbələ rayonundan olsalar da, onlar Bakı şəhərində yaşayırmışlar. Bu gün gecə saatlarında Nicat, ilk evliliyindən olan üç azyaşlı övladı, Lamiyə Qurbanova və onun qardaşı Rahil Qurbanovla Bakıdan çıxıb rayona, valideynlərinin evinə qonaq gedirmiş. Səhər saat 5 radələrində Qaraməryəm-İsmayıllı-Şəki avtomobil yolunun İsmayıllı rayonunun Topçu kəndi ərazisindən keçən hissəsində Nicat Əsgərovun idarə etdiyi VAZ-2115 markalı avtomobil yoldan çıxaraq aşıb. Nəticədə maşında olan sərnişinlər 19 yaşlı Lamiyə Qurbanova və Nicat Əsgərovun 3 yaşlı qızı hadisə yerində dünyasını dəyişiblər.

N.Əsgərov, iki azyaşlı övladı və R.Qurbanov isə müxtəlif dərəcəli bədən xəsarətləri alıblar.

***11:36

Martın 31-i saat 05:30 radələrində İsmayıllı rayonu ərazisində baş verən yol-nəqliyyat hadisəsi səbəbilə 3 nəfər (2 kişi, 1 qadın) İsmayıllı Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.

TƏBİB-dən bildirilib ki, yaralılara bədənin müxtəlif nahiyələrinin müştərək travmaları diaqnozları təyin olunub və zəruri tibbi yardım göstərilib.

Vəziyyətləri qənaətbəxş qiymətləndirilən şəxslər ambulator müalicə üçün evə buraxılıb.

Qeyd edək ki, hadisə zamanı 2000-ci il və 2023-cü il təvəllüdlü şəxslərin (qadın) həkiməqədər ölüm faktı qeydə alınıb./report

***10:23

Bu gün saat 05 radələrində Qaraməryəm-İsmayıllı-Şəki avtomobil yolunun İsmayıllı rayonunun Topçu kəndi ərazisindən keçən hissəsində ağır yol qəzası baş verib.

Avtosfer.az xəbər verir ki, Qəbələ rayon sakini Nicat Əsgərovun idarə etdiyi “VAZ-2115” markalı avtomobil yoldan çıxaraq aşıb.

Nəticədə nəqliyyat vasitəsində olan sərnişinlər - 19 yaşlı Lamiyə Qurbanova və 3 yaşlı qız hadisə yerində vəfat edib.

Həmçinin avtomobildə olan 21 yaşlı Rahil Qurbanov, eləcə də 5 yaşlı qız və 7 yaşlı oğlan da xəsarət alıb.

Qəzaya düşənlər bir ailənin üzvləridir.

DİN-in Mətbuat Xidmətinin regional qrupundan bildirilib ki, faktla bağlı cinayət işi başlanılıb, araşdırmalar aparılır./qafqazinfo