Yaşayış zonasında “hoqqa” verən yeniyetmə sürücü qəza törətdi - ANBAAN VİDEO

Abşeron rayonu, Xırdalan şəhərində yol hərəkəti qaydalarını kobud şəkildə pozan sürücü qəzaya səbəb olub.

Bu barədə izləyicilərdən biri Avtosfer.az-ın “İnstagram” ünvanına videomaterial göndərərək ətraflı məlumat verib. Hadisə martın 29-da saat 17:50 radələrində Vüsal Xəlilov küçəsində qeydə alınıb.

Görüntülərdən aydın olur ki, 77-YS-523 dövlət nömrə nişanlı “Khazar” markalı avtomobilin sürücüsü məhlədaxili yolda sürət həddini aşaraq döngəyə sərt şəkildə daxil olur. Nəticədə sürücü idarəetməni itirir və yol kənarında dayanmış “Mitsubishi” markalı avtomobilə çırpılır.

İzləyicinin sözlərinə görə, bu zaman yaxınlıqda azyaşlılar oyun oynayırmış. Xoşbəxtlikdən onların heç biri xəsarət almayıb. Eyni zamanda bildirilib ki, qəzanı törədən sürücünün yeniyetmə olduğu ehtimal edilir.

Hadisə nəticəsində hər iki nəqliyyat vasitəsinə maddi ziyan dəyib, xəsarət alan olmayıb.

Qeyd edək ki, məhlədaxili yollarda sürət həddinin aşılması və nəqliyyat vasitəsinin nəzarətsiz idarə olunması xüsusilə təhlükəlidir. Belə ərazilərdə piyadaların, o cümlədən uşaqların hərəkət ehtimalı yüksək olduğundan sürücülər daha diqqətli olmalı, sürəti minimum səviyyədə saxlamalı və manevrləri əvvəlcədən düzgün qiymətləndirməlidirlər.

Nərmin