Ötmə zamanı qayda pozdu; dəhşətli qəza baş verdi - DYP-dən VİDEO

Baş Dövlət Yol Polisi İdarəsi (BDYP) sürücülərə ötmə qaydalarına ciddi şəkildə riayət etmələri barədə xəbərdarlıq edib. Qurumdan verilən məlumata görə, yol hərəkəti təhlükəsizliyinin əsas şərtlərindən biri məhz ötmə əməliyyatının düzgün və təhlükəsiz şəkildə həyata keçirilməsidir.

Avtosfer.az-a bildirilib ki, ötmə yalnız icazə verilən, görünüş məsafəsinin aydın olduğu və qarşıdan gələn nəqliyyat vasitələrinin olmadığı hallarda aparılmalıdır. Lakin müşahidələr göstərir ki, bəzi sürücülər bu tələbləri pozaraq müəyyən olunmayan yerlərdə ötməyə cəhd edirlər. Bu isə qarşıdan gələn nəqliyyat vasitələri ilə toqquşma riskini artırır və çox zaman ağır, hətta faciəvi nəticələrə gətirib çıxarır.

Qurum sürücülərə xatırladır ki, yol nişanları və xətlənmələr təsadüfən qoyulmur – onların hər biri hərəkət iştirakçılarının təhlükəsizliyini təmin etmək, qəza riskini minimuma endirmək və insan həyatını qorumaq məqsədi daşıyır.

“Qadağan olunmuş yerdə ötmə təkcə inzibati qayda pozuntusu deyil, həm də digər sürücü və sərnişinlərin həyatına ciddi təhlükə yaradan məsuliyyətsiz davranışdır,” – deyə BDYPİ bildirib.