Rusiyada avtomobil dayanacağa çırpıldı: Ölən və yaralananlar var

Rusiyanın Yaroslavl şəhərində avtomobil dayanacağa çırpılıb. Hadisə nəticəsində bir nəfər həyatını itirib, iki nəfər isə xəsarət alıb.

Avtosfer.az xəbər verir ki, bu barədə regional Daxili İşlər Nazirliyinin (DİN) Mətbuat xidməti məlumat yayıb.

"Moskva vaxtı ilə saat 08:18 radələrində Tutayevsk şosesi, 1 ünvanının yaxınlığında xarici avtomobil idarə edən şəxs piyadaları və dayanacağı vurub. İlkin məlumatlara əsasən, yol-nəqliyyat hadisəsi nəticəsində 1985-ci il təvəllüdlü bir kişi dünyasını dəyişib, daha iki vətəndaş isə tibbi yardım göstərilməsi üçün xəstəxanaya yerləşdirilib", - deyə rəsmi məlumatda bildirilir.

Mətbuat xidmətinin məlumatına görə, nəqliyyat vasitəsinin sürücüsü polisin "saxla" tələbinə tabe olmayaraq yol hərəkəti qaydalarını kobud şəkildə pozub və hadisə yerindən qaçmağa cəhd göstərib. Qayda pozucusunun təqib edilməsi və saxlanılması üçün dərhal operativ tədbirlər görülüb. "Sürücülük hüququ olmayan 18 yaşlı sürücü saxlanılıb, hazırda onun barəsində cinayət işinin başlanması məsələsinə baxılır", - deyə qurumdan əlavə edilib. (oxu.az)