Sürücü avtomobili aşırdı: xəsarət alanlar var - Yevlaxda

Yevlax rayonunda idarəetməni itiriən sürücü avtomobilini dəmiryolu xəttinə çıxararaq aşırıb. "Report"un Qərb bürosunun məlumatına görə, Mingəçevir şəhərindən Yevlax rayonu istiqamətində hərəkətdə olan "Mercedes-Benz" markalı avtomobil "Stansiya Mingəçevir" ərazisində dəmiryolu xəttinin üzərindən yolu qarşı tərəfə keçmək istəyib. Bu zaman sürücü idarəetməni itirərək avtomobilini dəmiryolu xəttinin kənarlarında quraşdırılmış dəmir maneələrə çırpıb. Bir neçə maneələri qırdıqdan sonra aşan avtomobilin sərnişini, Bərdə rayonunun Qaratəpə kənd sakini, 1951-ci il təvəllüdlü Mina Səməd qızı Qasımova müxtəlif bədən xəsarətləri alıb. O, xəstəxanaya yerləşdirilib. Sürücünün xəsarəti isə yüngül olduğundan ona yerindəcə ambulator yardım göstərilib.

Hadisə ilə bağlı araşdırma aparılır.