Tovuzda velosipeddən yıxılan yeniyetmə ağır xəsarət alıb

Tovuzda velosipeddən yıxılan 15 yaşlı yeniyetmə oğlan ağır xəsarət alıb. Avtosfer.az-ın APA-ya istinadən məlumatına görə, hadisə rayonun Sarıtala kəndində baş verib.

Belə ki, 2010-cu il təvəllüdlü A.Kərimli kənd ərazisində velosiped sürərkən idarəetməni itirib və velosipedlə qonşunun dəmir qapısına çırpılıb. Bu zaman velosiped aşıb və A.Kərimli yerə yıxılıb.

Ağır xəsarət alan yeniyetmə xəstəxanaya yerləşdirilib. Yeniyetmənin vəziyyəti ağır olduğundan əməliyyat olunub. Hazırda velosipeddən yıxılan yeniyetmənin vəziyyətinin ağır olduğu bildirilir.

Faktla bağlı araşdırma aparılır.

***

TƏBİB-dən verilən məlumata görə, iyulun 15-də saat 21:00 radələrində 2010-cu il təvəllüdlü Sarıtala kənd sakini (kişi cinsli) ağır kəllə-beyin travması, kəllənin əsas sümüyünün sınığı, alt çənənin ikili sınığı diaqnozu ilə Tovuz Rayon Mərkəzi Xəstəxanasının Təcili yardım şöbəsinə hospitalizasiya olunub: "Şəxsə zəruri tibbi xidmətlər göstərilib. Hazırda müalicəsi Cərrahiyyə şöbəsinə davam etdirilir. Vəziyyəti ağır olaraq qiymətləndirilir".