Yanacaq daşıyan yük qatarı relsdən çıxıb – 1 ölü

Kanadanın mərkəzi Manitoba əyalətində yanacaq daşıyan yük qatarının relsdən çıxması nəticəsində 1 nəfər ölüb.  Avtosfer.az “Report”a istinadən xəbər verir ki, bu barədə bazar günü CBC telekanalı məlumat yayıb. Hadisə şənbə günü axşam bölgənin şimalında yerləşən ucqar ərazidə baş verib. Hələ ki, məlum olmayan səbəblərdən qatarın üç lokomotivi və bir neçə ilk vaqonu relsdən çıxıb. Qəza zamanı ön lokomotivdə olan iki maşinist sıxılaraq xəsarət alıb. Onlardan biri ilkin tibbi yardım göstərilənədək ölüb, digəri vertolyotla Tompson şəhər xəstəxanasına aparılıb. Onun vəziyyəti ağırdır. Üç lokomotiv və 27 vaqondan ibarət qatar "Arctic Gateway Group" şirkətinə məxsus olub və yanacaq daşıyıb. İlkin məlumata görə, sisternlərdən yanacaq sızması baş verməyib.