YPX avtomobilinin iştirakı ilə baş verən qəza barədə RƏSMİ AÇIQLAMA - VİDEO - YENİLƏNİB

"DYP-nin Dövlət Ekoloji Nəzarət Postunun yaxınlığında Yol Patrul Xidməti (YPX) avtomobilinin iştirakı ilə qeydə alınan yol-nəqliyyat hadisəsi dekabrın 31-i saat 14:00-da baş verib".

Bu məlumat Baş Dövlət Yol Polisi İdarəsindən (BDYPİ) verilib.

Qeyd olunub ki, qəza Bakı-Quba yolunun Biləcəri qəsəbəsi ərazisindən keçən hissəsində baş verib:

"YPX-yə məxsus BMW markalı avtomobil maneəyə çırpılıb. Hadisə nəticəsində xəsarət alan və həlak olan yoxdur. Bu, maddi zərərlə nəticələnən yol-nəqliyyat hadisəsidir", - deyə məlumatda bildirilir.

***

Bakı-Sumqayıt yolunda, DYP-nin Dövlət Ekoloji Nəzarət Postunun yaxınlığında ağır yol-nəqliyyat hadisəsi baş verib.

Avtosfer.az xəbər verir ki, qəzanın videogörüntüləri sosial şəbəkədə yayımlanıb.

Hadisə şahidlərinin sözlərinə görə, Yol Patrul Xidmətinə (YPX) məxsus BMW markalı avtomobil ilə 10-TM-138 dövlət nömrə nişanlı BMW markalı maşın toqquşub.

Qəzanın yüksək sürət səbəbindən baş verdiyi bildirilir. Xoşbəxtlikdən hadisə zamanı ölən olmayıb. Lakin yaralıların olub-olmaması ilə bağlı hələlik rəsmi məlumat verilməyib.

Hadisə ilə bağlı Baş Dövlət Yol Polisi İdarəsinə (BDYP) sorğu verilib.

(oxu.az)