Azərbaycanda ödəniş kartları ilə fırıldaqçılıq hallarının sayı BEŞ MİNİ ÖTÜB

Bu ilin II rübündə Azərbaycanda ödəniş kartları ilə ölkədaxili 1 milyon 74 min 526 manat həcmində 5 305 fırıldaqçılıq halı baş verib.

Avtosfer.az xəbər verir ki, bu barədə Azərbaycan Mərkəzi Bankı məlumat yayıb.

Ölkə daxilində fırıldaqçılıq hallarının məbləği cari ilin I rübü ilə müqayisədə 20,43% azalıb, sayı isə 6.2% artıb.

Hesabat dövründə ölkədaxili fırıldaqçılıq hallarının 33,9%-i hesabların ələ keçirilməsi ilə bağlı olub. Ölkəxarici fırıldaqçılıq hallarının isə 45,9%-i kartın fiziki iştirakı olmadan həyata keçirilib.

Cari ilin II rübündə həm ölkədaxili, həm də ölkəxarici fırıldaqçılıq əsasən elektron ticarət və mobil tətbiqlər üzərindən baş verib. Ölkədaxili fırıldaqçılıq hallarının 93,1%-i, ölkəxarici halların isə 92,8%-i məhz elektron ticarət və mobil tətbiqlər vasitəsilə qeydə alınıb.