Marketlərdə “endirim oyunu” : vətəndaşlar çürümüş məhsullardan şikayətlənir - VİDEO

Sosial mediada paylaşılan bir video marketlərdə tətbiq edilən endirimlər ilə  bağlı yeni suallar doğurub. 
Avtosfer.az xəbər verir ki, vətəndaşlardan biri paytaxtdakı iri marketlərdən birində endirimə çıxarılan məhsulların görüntülərini yayımlayıb. Onun iddiasına görə, endirimli malların bir qismi artıq tamamilə xarab olub.

Paylaşımda xüsusilə qızıl balığı və avokado nümunələri diqqət çəkir. Vətəndaş bildirir ki, market qızıl balığını endirimə çıxarsa da məhsul artıq yararsız vəziyyətdə olub. Avokadolar isə videoda açıq-aşkar əzilmiş, qaralmış və çürümüş halda görünür.

Şikayətçi qeyd edir ki, “normalda baha qiymətə satılan məhsullar xarab olduqda endirimə düşür. Bu məhsulları normal qiymətə qoysalar vərəndaşlar da rahat şəkildə alar. İndi isə bu məhsulların bir çoxu tullanacaq”. — deyə vətəndaş bildirir.

Qida təhlükəsizliyi məsələləri bütün dünyada prioritet sahələrdən biri sayılır. Çünki keyfiyyətsiz və xarab olmuş ərzaqlar həm qida zəhərlənməsinə, həm də daha ciddi sağlamlıq fəsadlarına səbəb ola bilər. Bu səbəbdən, mütəxəssislər daim həm market sahiblərini, həm də alıcıları diqqətli olmağa çağırırlar.

Xatırladaq ki, qanunvericiliyə görə, istifadə müddəti bitmiş və ya xarab olmuş məhsulların satışa çıxarılması qadağandır. Qanun pozuntusu aşkar edildikdə isə həm cərimə, həm də fəaliyyətin dayandırılması tədbirləri tətbiq oluna bilər.

Fidan