Masazır, Xırdalan, hətta Ceyranbatana qədər metronu uzatmaq olar - EKSPERTDƏN TƏKLİF

Bu günlərdə açıqlanan rəsmi məlumata əsasən, metronun "Nizami" stansiyasından sonra "Sahil" stansiyasının yaxınlığında da bir stansiya inşa olunacaq və qırmızı xəttə keçid olacaq.  Qeyd edək ki, uzun illərdir Bakının müxtəlif istiqamətlərində yeni metro stansiyaları tikilsə də, əhalinin daha çox məskunlaşdığı Bayıl, 20-ci sahə və Bibiheybət ərazilərində metro inşa olunmur. Hansı ki, bu ərazidən səhər və axşam saatlarında "Azneft" dairəsi istiqamətinə gələn insanlar çox vaxt tıxacda qalmalı olurlar və getdiyi ünvanlara gecikirlər. Üstəlik neçə ildir ki, paytaxtın mərkəzində Formula 1 yarışları keçirilir deyə, yarışın keçiriləcəyi müəyyən vaxt ərzində "Azneft" dairəsi bağlandığı üçün qeyd olunan ərazilərdə yaşayan insanlar demək olar ki, nəqliyyatsız qalırlar. Və belə olduğu halda bu ərazilərdə də metro stansiyalarının tikintisinin vacibliyi önə çıxır.

Avtosfer.az-ın məlumatına görə, mövzu ilə bağlı Redaktor.az-a danışan nəqliyyat eksperti Elməddin Muradlı bildirdi ki, Bayıl, 20-ci sahə və Bibiheybət qəsəbələrində metro tikintisinə ehtiyac var:

"Sadəcə bu proqrama salınmayıb. Gələcəkdə ola bilsin ki, o məsələyə ayrıca baxılar. Xüsusən Masazır, Xırdalan, hətta Ceyranbatana qədər metronu uzatmaq olar. Mənim də təklifim var ki, Bayılın indiki sahəsində metrostansiya olsun və həmin stansiyanı Lökbatana uzadıb, oradan da Xocasənə birləşdirmək olar".

Onun sözlərinə görə, bəzən Bakı deyəndə ancaq şəhərin mərkəzi nəzərdə tutulur:

"Biz də fikirləşirik ki, bu Lökbatan da Bakının bir hissəsidir, Qaradağ rayonunun ərazisidir. Bayıl da Səbail rayonunun ərazisidir. Proqramı hazırlayanlar bir az fərqli yanaşırlar. Mərkəz deyəndə ancaq Ağ Şəhəri, "Sahil" metrosunu, "Nizami" metrosunu nəzərdə tuturlar. Amma bu tərəfləri də unutmaq olmaz. Düşünürəm ki, gələcəkdə bu məsələyə mütləq baxılmalıdır".