Smartfonlar yaddaşımızı necə məhv edir?

Oksford Universitetinin koqnitiv elmlər şöbəsinin apardığı araşdırma müasir insanların yaddaş strukturunun tamamilə dəyişdiyini və təhlükəli həddə çatdığını göstərir.

Avtosfer.az Redaktor.az-a istinadən xəbər verir ki, alimlər buna "rəqəmsal amneziya" (və ya Google effekti) adı veriblər. Beynimiz çox qənaətcil bir orqandır; əgər məlumatın internetdə və ya telefonda qeyd olunduğunu bilirsə, onu uzunmüddətli yaddaşa köçürməyə ehtiyac duymur və dərhal silir. Bu səbəbdən müasir insanlar ən yaxınlarının telefon nömrələrini, ünvanları və hətta bir neçə gün əvvəl oxuduqları vacib məlumatları belə xatırlamaqda çətinlik çəkirlər.

Psixoloqlar xəbərdarlıq edir ki, bu proses beynin neyron əlaqələrini zəiflədir və gənc yaşlarda unudanlıq xəstəliyinin əsasını qoyur. Beyni qorumaq üçün hər gün naviqatorsuz yol tapmaq, telefon nömrələrini əzbərləmək və rəqəmsal detoks etmək mütləqdir.