Qala-Pirallahı yolunun 1 km-lik hissəsi yenidən qurulub - FOTO + VİDEO

Qala-Pirallahı avtomobil yolunun Pirallahı körpüsünün girişinə qədər 1 km uzunluğunda olan yanaşma yolunun yenidən qurulması işləri tam olaraq yekunlaşıb. Avtosfer.az-ın "Azəravtoyol" ASC-yə istinadən verdiyi xəbərə görə, yenidənqurma işləri çərçivəsində yolun mövcud eni 7 metrdən 21-22-i metrə qədər və dənizə doğru genişləndirilib, 25 metr enində karbonat materialından istifadə edilərək yeni yol yatağı, qum-çınqıl və optimal-qırmadaş qarışığından ibarət isə yol əsasının inşası işləri aparılıb. Daha sonra yol boyu ikiqat olmaqla yeni asfalt-beton örtüyü döşənib. Ümumilikdə isə 19 min kv. metr əraziyə 12 sm qalınlığında asfalt-beton örtüyü salınıb. Layihəyə çərçivəsində sözügedən hissədə yol 2 gediş, 2 gəliş olmaqla 4 hərəkət zolağından ibarətdir. Yolun hərəkət hissəsinin eni 16 metr təşkil edir. Buna paralel olaraq yol boyu 1,5 m enində piyada səkiləri, 2-3 m enində ayrıcı zolaq inşa olunub. Ümumilikdə, 3 300 kv.m piyada səkisi tikilib, səkilərin və yol ayrıcının kənarlarına isə 6 350 poqon metr yeni səki daşı düzülüb. Tikinti işlərinə əsasən kommunikasiya xətlərinin yolun altından keçirilməsi üçün 14 yerdə müxtəlif diametrli borular, 10 ədəd kommunikasiya lyukları, bundan başqa yağış sularının yoldan kənarlaşdırılmasını təmin etmək üçün isə 10 ədəd yağış barmaqlığı qoyulub. Həmçinin, yol boyu 480 m uzunluğunda yeni istinad divarı inşa edilib. Yenidənqurma işləri bitdikdən sonra zəruri olan yerlərdə yol nişanları və məlumatverici nişanlar quraşdırılıb, yolun üfiqi nişanlanma xətlərinin çəkilişi işləri aparılıb. Pirallahı körpüsünün digər hissəsinin yanaşma yolunda da işlər sürətlə aparılır. Hazırda burada torpaq işləri aparılır, yeni yol yatağı və yol əsası inşa olunur. Buna paralel olaraq dəmir-beton konsturksiyalarının sahil boyunca bərkitmə işləri də aparılır. 850 metr uzunluğunda olan yanaşma yolu II texniki dərəcəyə uyğun olaraq yenidən qurulur. Layihə çərçivəsində yol yatağı 12 metrə qədər genişləndirilib. 2 hərəkət zolaqlı olan yolun hərəkət hissəsinin eni 6 m, çiyinlərin eni isə 1,5 m təşkil edir. Qeyd edək ki, Qala-Pirallahı avtomobil yolunun 23-cü kilometrliyində yerləşən və uzunluğu 422 metr, eni 14 metr, hərəkət hissəsinin eni isə 12 metr olan, Pirallahı adasını sahillə birləşdirən körpü Bakı şəhəri və onun qəsəbələrinin sosial-iqtisadi inkişafına dair Dövlət Proqramına uyğun olaraq tikilib.