Müvəffəqiyyətə gedən yol - Polkovnik-leytenant Əbülfət Bədəlov

“İnsan harada işləməsindən asılı olmayaraq dövlətinə, xalqına sədaqətlə xidmət etməlidir. Alnıaçıq, başı uca yaşamaq insanı daha da ruhlandırır, sanki ikinci ömür qazandırır”-deyir polis polkovnik-leytenantı Əbülfət Bədəlov. Həyatda hər kəsin bir mövqeyə çatmaq istədiyini və məqsədi olduğunu deyən polis zabiti seçdiyin peşədən asılı olmayaraq daim öz üzərində böyük zəhmətlə çalışmağın vacibliyini bildirdi.

1969-cu ildə İsmayıllı rayonunun Talıstan kəndində dünyaya göz açan Ə.Bədəlov ilk təhsilini doğulub boya-başa çatdığı kənddə alıb. Orta məktəbi bitirdikdən sonra hərbi xidmətə yollanıb. 1989-1993-cü illərdə Azərbaycan Dövlət Texniki Universitetində ali təhsil alıb. Qaynar tələbəlik illərində dərslərində fərqlənməklə yanaşı, ictimai işlərdə də fəallıq göstərib. Bacarığı və təşkilatçılığı ilə seçilməyi bacarıb. 1994-cü ildə İsmayıllı Rayon Mühafizə Şöbəsində polis nəfəri kimi xidmətə qəbul olunub. Daha sonra RPŞ-də sahə inspektoru, uzun müddət ictimai təhlükəsizlik bölməsinin rəisi vəzifəsində çalışıb. Xidməti ərzində özünü səriştəli, bacarıqlı əməkdaş kimi təqdim edib. Onun bacarığı, işinə can yandırması diqqətdən yayınmayıb. 2012-ci ildə xidmət üzrə rəis müavini vəzifəsinə təyin olunub.

Polis polkovnik-leytenantı Ə.Bədəlov 2016-cı ildən Oğuz RPŞ-də şəxsi heyətlə iş üzrə rəis köməkçisi vəzifəsində xidmətini davam etdirir. Və bu vəzifədə də eyni kriteriyalar-məsuliyyət, cavabdehlik ilə çalışır. “Sağlam atmosferin və səmimi münasibətin olduğu kollektivin uğurları da hər zaman çox olur” –deyir Ə.Bədəlov..

Mahir Məsimov,

DİN Mətbuat Xidmətinin əməkdaşı