Avtomatik maşını mexanika kimi idarə etmək mümkün olacaq – YENİLİK

Avtomatik sürətlər qutusu ilə təchiz edilmiş avtomobillərdə sürücüyə mexaniki ötürmə təcrübəsi yaşatmağa imkan verən yeni texnologiya hazırlanıb. “Quickshift” adlı sistem debriyaj pedalına ehtiyac olmadan sürücünün ötürmələri özü dəyişməsinə imkan verir.

Avtosfer.az xəbər verir ki, “Limitless Engineering” şirkəti tərəfindən hazırlanmış sistem avtomatik sürətlər qutusu ilə idarə olunan avtomobillərdə mexaniki ötürmə hissini yaratmağı hədəfləyir.

Ferris Rezvaninin imzasını daşıyan “Quickshift” ənənəvi mexaniki sürət qoluna bənzəyir. Sistem avtomobilin mövcud transmissiya idarəetmə bloku ilə əlaqə yaradaraq sürücüyə ötürmələri özü seçmək və mühərrikin dövrlərini uyğunlaşdıraraq keçidlər etmək imkanı verir.

Sistemin əsas fərqi isə ənənəvi mexaniki avtomobillərdən fərqli olaraq debriyaj pedalına ehtiyac yaratmamasıdır.

“Quickshift”in digər diqqətçəkən xüsusiyyəti avtomobilin konstruksiyasında qalıcı dəyişiklik tələb etməməsidir. Şirkətin məlumatına görə, sistem bir neçə saat ərzində quraşdırıla və zərurət yarandıqda avtomobildən çıxarıla bilər.

Texnologiyanın iş prinsipi “Ferrari 458” üzərində nümayiş etdirilib. Bununla belə, Ferris Rezvani sistemin yalnız bir avtomobil modeli ilə məhdudlaşmadığını və müxtəlif avtomobillərə uyğunlaşdırılmaq üçün hazırlandığını bildirib.

Rezvaninin sözlərinə görə, müasir avtomobillərdə texnologiyanın inkişafı sürücülə avtomobil arasındakı bəzi fiziki əlaqələri arxa plana keçirib. “Quickshift” isə sürücünün ötürmə qoluna toxunması, onun mexaniki hərəkətini hiss etməsi və mühərrikin reaksiyasını eşitməsi kimi elementləri yenidən sürüş təcrübəsinə qaytarmağı hədəfləyir.

“Quickshift köhnə tipli mexaniki transmissiya deyil, mexaniki sürətlər qutusunun müasir versiyası kimi hazırlanıb”, – deyə Rezvani bildirib.

Bununla belə, sistemlə bağlı əsas suallardan biri onun qiymətidir. “Limitless Engineering” əsasən fərdi sifarişlər əsasında layihələr həyata keçirdiyindən “Quickshift” üçün bütün avtomobillərə şamil olunan vahid qiymət açıqlanmayıb.

Sistemin yekun qiymətinin avtomobilin modelindən, quraşdırmanın əhatə dairəsindən və interyerə nə dərəcədə inteqrasiya olunacağından asılı olaraq dəyişəcəyi bildirilir. Xüsusilə daha köhnə və nisbətən ucuz

avtomobillərə belə bir sistemin quraşdırılması bəzi hallarda avtomobilin dəyərinə yaxın və ya ondan yüksək xərc tələb edə bilər.

Eltac Zülfüqaroğlu