Çin avtomobillərinin sığorta problemi

Çin istehsalı olan nəqliyyat vasitələrinin bir çox ölkədə ciddi paya sahib olması hamıya məlumdur. Bu ölkə elektromobil istehsalı və həcminə görə isə dünya lideridir. Lakin məsələ problemsiz ötüşmür. 

Avtosfer.az xəbər verir ki, Avropada Çin avtomobili alanlar artıq ciddi sığorta problemləri ilə üzləşirlər. Elektromobil sahiblərinin işi daha ağırdır. Bu texnikanın təmiri ənənəvi avtomobillərdən daha baha başa gəlir. Çin elektromobillərinin təmirinə gəlincə isə, bu barədə yetərli qədər təcrübə, proqram təminatı, ehtiyat hissələri və kataloq yoxdur. Hətta bir çox ölkədə rəsmi dilerdə belə, kuzov detallarını tapmaq həftələrlə vaxt aparır. Bu səbəbdən bir çox sığorta şirkəti ya Çin elektromobillərini sığorta etmir, ya da çox böyük qiymətə, benzin analoqlarından 4-5 dəfə yüksək qiymətə sığortalayır. Belə bir faktı da nəzərə azlaq ki, elektromobilə əsasən gənclər maraq göstərirlər. Bu da sığorta şirkətləri üçün xərclərin artması deməkdir. 

Əgər 5-6 il əvvəl avropada elektromobillər daha aşağı qiymətə sığortalandığı üçün maraq cəlb edidisə, indi vəziyyət dəyişib. Avropada ucuz sığorta dövrü bitdiyi üçün ikinci əl elektromobillərə maraq da azalır.

Vüqar