Məşhur avtomobil şirkətindən sürücülərə xəbərdarlıq – 13 minə yaxın model geri çağırıldı - FOTO

“Volkswagen” şirkəti elektrik doldurma zamanı yüksək gərginlikli akkumulyator elementlərində yaranan potensial həddindən artıq qızma ehtimalı ilə bağlı 12 352 ədəd “Touareg” modelini qlobal miqyasda geri çağırıb.

Avtosfer.az xəbər verir ki, şirkət bu addımı mümkün texniki nasazlıqların qarşısını almaq üçün “ehtiyat tədbiri” kimi qiymətləndirib.

Almaniyanın Federal Avtomobil Nəqliyyatı İdarəsi (KBA) bildirib ki, sözügedən texniki problem yanğın riski yarada bilər. Lakin qurum indiyədək nə yanğın, nə də hər hansı xəsarət alma halının qeydə alınmadığını vurğulayıb.

Geri çağırılma proqramı 2018-ci ilin sentyabr və 2024-ci ilin avqust tarixləri arasında istehsal olunmuş “Touareg” modellərini əhatə edir. Bu çərçivədə təkcə Almaniyada 4 853, digər ölkələrdə isə 7 000-dən çox avtomobil səlahiyyətli xidmət mərkəzlərinə çağırılıb.

“Volkswagen” xidmət mərkəzlərinə akkumulyator idarəetmə proqramının yenilənməsi ilə bağlı təlimat göndərib. Yenilənmiş proqram təminatı akkumulyator hüceyrələrinin vəziyyətini daha dəqiq şəkildə izləməyə imkan verəcək və mümkün qızma hallarının vaxtında aşkarlanmasına xidmət edəcək.

Hazırda geri çağırılma proqramı davam etdirilir və avtomobil sahiblərinə rəsmi xidmət mərkəzlərinə müraciət etmələri tövsiyə olunur.

Eltac Zülfüqaroğlu