“Volkswagen” müştərinin sifarişini 37 il sonra icra etdi

1987-ci ildə “Volkswagen Golf almış” amerikalı müəllimin sifarişi yerinə yetirilib.

Avtosfer.az xəbər verir ki, 1987-ci ildə “Volkswagen” şirkəti ABŞ-da belə bir kampaniya təşkil edir: hər kəs Almaniyadakı zavoda gedərək özü avtomobil seçə bilər.

Avropada bir neçə günlük gəzintidən sonra maşını okeanın o tayına şirkət özü aparacaq. 

Reklam kampaniyası uğurla keçir və minlərlə amerikalı bu yolla Avropa ilə tanış olur. Bunların arasında Çarlen Conson adlı müəllim də olur. Niderlanda qısa müddətə təyinat alan qız da kampaniyadan xəbər tutaraq özü üçün bir “Golf” kabriolet seçir. Məqsəd 2 aydan sonra vətənə qayıtmaq idi, lakin hər şey bir anda dəyişir. 
Conson maşını alandan bir neçə gün sonra bir niderlandlı ilə ailə qurur, uşaqlarını dünyaya gətirir və elə bu ölkədəcə yaşamağa başlayır. “Golf” onun gəlin maşını olur. Sonradan ailə bu maşınla bütün Avropanı dolaşır.

Hadisənin üzərindən 37 il keçdikdən sonra – 2024-cü ildə qadın doğma Montana ştatında ev alır və ora köçür. Lakin maşın da unudulmur. O, məsələ ilə bağlı “Volkswagen” şirkətinə müraciət edərək 1987-ci ildəki razılaşmanı xatırladır. 

Alman şirkəti müqavilədən irəli gələn öhdəliyinə əməl edərək maşını xüsusi konteynerlə Amerikaya göndərir. 2024-cü ildə gəmi ilə yola salınan maşın bir neçə gün əvvəl sahibinə təslim edilib.  Bu həm də alman istehsalçı üçün yaxşı reklam olub.

Vüqar Yaşaroğlu