Bu yoldakı lyuklar sürücüləri boğaza yığıb - VİDEO

Paytaxtın Azadlıq prospektində, daha dəqiq desək prospektin sağ hərəkət hissəsində yolun bərbad halda olması ilə bağlı bir neçə sürücü redaksiyamızın qaynar xəttinə şikayət ünvanlayıb. Avtosfer.az xəbər verir ki, prospektin əsas hərəkət hissəsindən sağa Süleyman Sani Axundov küçəsinə dönmək mümkün deyil. Çünki orada hərəkət düzünə təşkil edilib. Sürücülər sağa dönmək üçün öncədən Cəfər Xəndan küçəsilə kəsişmədən sağ hərəkət hissəsinə keçməli olurlar.

Lakin yolun asfalt örtüyünün bərbad vəziyyətdə olması sürücülərə ciddi çətinlik yaradır. Bundan əlavə, kanalizasiya qapaqlarının asfalt səviyyəsi ilə eyni olmaması səbəbindən avtomobillərin təkərləri çuxurlara düşür. Yolda belə qapaqların sayının çox olması sürücüləri onlardan yayınmaq üçün gah sağa, gah da sola qəfil manevrlər etməyə məcbur edir. Bu isə digər hərəkət iştirakçıları üçün qəza riskini xeyli artırır.

Sürücülər yaranmış bu vəziyyətin aradan qaldırılması üçün aidiyyəti qurumlardan asfalt örtüyünün dəyişdirilməsini xahiş edirlər.

Fərid