Mühərrikin dövrəsi 4.000-dən yuxarı niyə qalxmır? – SAHİL USTA AÇIQLADI - FOTO

Avtomobil idarə edən hər bir kəs yolda olduğu qədər də, bəzən yerində mühərrikin davranışlarını yoxlayır.
Avtosfer.az xəbər verir ki, çoxları üçün adi görünən bir hal var: sürücü qaz pedalını sona qədər bassada, takometrin göstəricisi 4 min dövrdən yuxarı qalxmır. İlk baxışdan bu, mühərrikin qorunma sistemi, yanacaq sərfiyyatı və ya sürətlər qutusu ilə bağlı sadə bir məhdudiyyət kimi görünə bilər. Amma əslində, bu vəziyyətin arxasında həm təhlükəsizlik məqsədilə qoyulan texniki məhdudiyyətlər, həm də avtomobildə yarana biləcək nasazlıqlar dayana bilər.

Məsələ ilə bağlı Sahil Ağabəyli saytımıza bildirib ki, yanacaq nasosunun zəif işləməsi və ya filtrin tutulması mühərrikin tələb olunan qədər yanacaq ala bilməməsinə gətirib çıxara bilər.  Bu da onun gücünü azaldır və yüksək dövrlərə qalxmasına mane olur: 
“Digər tərəfdən, sürətlər qutusunda texniki nasazlıq olduqda ötürmələr tam gücü mühərrikdən təkərlərə ötürə bilmir və nəticədə avtomobil dördüncü sürətə keçmir. Lakin maraqlı məqam odur ki, avtomobil hərəkətsiz vəziyyətdə olarkən qaz pedalına basıldıqda mühərrik dövrlərinin 4.000-dən yuxarı qalxması mümkündür. Bu avtomobilin texniki imkanlarının olduğunu göstərir, amma burada da diqqət edilməli bir nüans var. Zavod istehsalçıları avtomobilin hərəkətsiz halda yüksək dövrlərdə işlədilməsini qadağan edirlər. Çünki mühərrik bu vəziyyətdə həddindən artıq yüklənir, yağ dövriyyəsi normal olmur və müxtəlif detallara ciddi zərər dəyə bilər”. 

Fidan