Yolun ortasında maşın saxlayıb taksi sürücüsünə hücum çəkdi - “Siqnal vermə” - VİDEO

Paytaxtın mərkəzi küçələrindən birində sürücünün məsuliyyətsiz davranışı səbəbindən nəqliyyatın hərəkətində ciddi sıxlıq yaranıb. 

Avtosfer.az xəbər verir ki, hadisə zamanı 90-TF-797 dövlət nömrə nişanlı “Land Rover LR2” markalı avtomobilin sürücüsü yolun sağ zolağında avtomobilini saxlayaraq digər nəqliyyat vasitələrinin hərəkətinə əngəl yaradıb.

Sosial şəbəkələrdə yayılan görüntülərdən aydın görünür ki, avtomobilin qeyri-qanuni dayanması səbəbindən əraziyə keçmək istəyən digər sürücülər çətinliklə üzləşiblər. Xüsusilə taksi sürücüsü ilə həmin avtomobilin arxasında dayanan başqa bir sürücü arasında sərt mübahisə yaşanıb.

Kadrlarda, həmçinin, bir motosiklet sürücüsünün “Yolu açın, işimiz var!” deyə irad bildirməsi diqqət çəkir. Hadisə nəticəsində yolun həmin hissəsində nəqliyyat axını bir neçə dəqiqəlik dayanıb, bu isə digər sürücülərin narazılığına səbəb olub.

Qeyd edək ki, dayanma və durma qaydalarının pozulması, xüsusilə intensiv hərəkət olan küçələrdə bu kimi hallara yol verilməsi, Yol Hərəkəti Haqqında Qanunun açıq şəkildə pozulmasıdır və bu cür hərəkətlər inzibati cərimə ilə nəticələnə bilər.

Eltac Zülfüqaroğlu