12 il əvvəl və bu gün: Qazaxıstanda eyni tarixdə iki təyyarə qəzası - FOTO

Aktau yaxınlığında baş verən "Azərbaycan Hava Yolları" (AZAL) aviaşirkətinin "Embraer 190" təyyarəsinin qəzası son 15 ildə Qazaxıstanda baş verən dördüncü belə hadisədir.

Avtosfer.az xəbər verir ki, bu barədə "Militarist" "Telegram" kanalı xəbər verib.

Bildirilir ki, bu qəzaların hamısı dekabr və yanvar aylarında baş verib (biri - düz 12 il əvvəl eyni gündə).

25 dekabr 2012-ci ildə Şımkent yaxınlığında Qazaxıstan Milli Təhlükəsizlik Komitəsinin Sərhəd Xidmətinin "An-72" təyyarəsi qəzaya uğrayıb, o zaman göyərtədə olan 27 nəfərin hamısı həlak olub.

Bir ay sonra, 29 yanvar 2013-cü ildə Kokşetaudan uçan SCAT aviaşirkətinin təyyarəsi Almatı hava limanı yaxınlığında qəzaya uğrayıb. O zaman 21 nəfər həlak olub.

27 dekabr 2019-cu ildə Astanaya uçan "Bek Air" aviaşirkətinin "Fokker 100" təyyarəsi Almatıda qəzaya uğrayıb, 13 nəfər həlak olub.

Xatırladaq ki, AZAL-a məxsus J2-8243 nömrəli Bakı-Qroznı reysini yerinə yetirən "Embraer 190" təyyarəsi Aktau şəhərinin 3 km yaxınlığında qəzaya uğrayıb. İlkin məlumata görə, hadisəyə səbəb hava gəmisinin quş sürüsü ilə toqquşması olub. Təyyarədə beş ekipaj üzvü olmaqla, ümumilikdə 67 nəfər (37-si Azərbaycan, 16-sı Rusiya, altısı Qazaxıstan və üçü Qırğızıstan vətəndaşı) olub. Son məlumatlara görə, 32 nəfər sağdır.