239 nəfərlə yoxa çıxan təyyarə ilə bağlı yeni qərar

Malayziya hökuməti göyərtəsində 239 nəfərin olduğu "Malaysia Airlines" aviaşirkətinə məxsus "MH370" reysi ilə itkin düşən təyyarənin qalıqlarının tapılması üçün aparılan axtarış işlərini 30 iyun 2027-ci ilədək uzadıb.

Avtosfer.az "Qaynarinfo"ya istinadən xəbər verir ki, "The Star" qəzetinin məlumatına görə, qərar Nazirlər Kabinetinin iclasında qəbul edilib. Malayziyanın nəqliyyat naziri Entoni Lok bildirib ki, axtarış əməliyyatı 1 iyuldan etibarən daha bir il davam etdiriləcək və yeni müddət 30 iyun 2027-ci ilədək qüvvədə olacaq.

Nazir qeyd edib ki, axtarışları həyata keçirən "Ocean Infinity" şirkəti təyyarənin qalıqlarını tapa bilməyəcəyi təqdirdə Malayziya hökuməti şirkətə heç bir ödəniş etməyəcək. Əgər qalıqlar aşkar olunarsa, şirkətə 70 milyon ABŞ dolları məbləğində mükafat veriləcək.

Malayziya 2025-ci ilin dekabrında Hind okeanında "MH370" reysi ilə bağlı axtarış işlərini yenidən bərpa etmişdi.

2014-cü il martın 8-də Kuala Lumpur Beynəlxalq Hava Limanından Pekinə uçan "Malaysia Airlines" aviaşirkətinin "MH370" reysi havaya qalxdıqdan 38 dəqiqə sonra dispetçerlərlə sonuncu dəfə əlaqə saxlayıb.

Hərbi radar məlumatlarına görə, təyyarə planlaşdırılmış marşrutdan kənara çıxaraq qərbə istiqamətlənib, daha sonra isə Hind okeanının cənubuna doğru hərəkət edib.

Göyərtəsində 227 sərnişin və 12 ekipaj üzvünün olduğu təyyarənin Hind okeanının cənubunda qəzaya uğradığı ehtimal edilən ərazilərdə aparılan axtarışlar aviasiya tarixinin ən bahalı axtarış-xilasetmə əməliyyatlarından biri hesab olunur. İndiyədək yalnız "MH370" reysinə aid olduğu ehtimal edilən bəzi qalıqlar tapılıb, təyyarənin əsas gövdəsi isə hələ də aşkar edilməyib.