4 nəfərin xəsarət almasına səbəb olan sürücünün ibtidai istintaqı başa çatıb

Qobustan rayonunda yol-nəqliyyat hadisəsi törətməkdə təqsirləndirilən Nemət Abduləliyevin cinayət işi üzrə ibtidai istintaq başa çatıb. Avtosfer.az-ın "Report"a istinadən xəbərinə görə, onun barəsində toplanan cinayət işinin materialları baxılması üçün Qobustan Rayon Məhkəməsinə göndərilib.

Cinayət işi hakim Mirələm Quliyevin icraatına verilib.

Məhkəmənin hazırlıq iclası aprelin 30-na təyin edilib. Cinayət işində 4 zərərçəkmiş var.

Qeyd edək ki, hadisə bu il fevralın 18-də Qobustan rayonunun Qobustan-Sündü-Xilmilli avtomobil yolunun 2-ci kilometrliyində baş verib. Rayonun Cəyirli kənd sakini, 35 yaşlı N.Abduləliyevin idarə etdiyi "VAZ-2107" markalı minik avtomobili ilə "Mercedes" markalı minik avtomobili toqquşub. Zərbənin təsirindən "VAZ-2107" markalı avtomobil yoldan çıxaraq aşıb. Nəticədə sürücü N.Abduləliyev və onun həyat yoldaşı, 35 yaşlı İlhamə Abduləliyeva, oğlu, 7 yaşlı Ayxan Abduləliyev və avtomobildə olan digər sərnişin, qohumları, 42 yaşlı Mahruq Məcidova ağır bədən xəsarətləri alıblar.