Ağsuda evlərdən və mağazalardan oğurluq edən şəxs tutulub

Ağsuda evlərə və marketlərə qənim kəsilən oğru polis tərəfindən saxlanılıb. Avtosfer.az-ın ONA-ya istinadən xəbərinə görə, Ağsu rayon Polis Şöbəsinin əməkdaşları tərəfindən keçirilmiş əməliyyat-axtarış tədbirləri nəticəsində müəyyən edilib ki, 1992-ci il təvəllüdlü, Ağsu şəhəri Vidadi küçəsi ev 82 mənzil 11-də yaşayan Ərəstunzadə Alim Mahir oğlu 3 mart 2019-cu il tarixdə Ağsu şəhəri Nizami küçəsində yerləşən Məmmədov Samir Əlşah oğluna məxsus mağazadan 105 manat nəğd pulu, 15 manat dəyərində siqarət və ətir əşyalarını, 5 mart 2019-cu il tarixdə Ağsu şəhəri M.Ə.Rəsulzadə küçəsində yerləşən Kazımov Rəşad Akif oğluna məxsus aptekdən 450 manat nəğd pulu və 10 mart 2019-cu il tarixdə Ağsu şəhəri S.Vurğun küçəsində yerləşən Xəlilov Bəylər Niyaz oğluna məxsus mağazadan 350 manat nəğd pulu gizli yolla talayaraq, vətəndaşlara maddi ziyan vurmaqla oğurluq edib.

​Qeyd olunan oğurluq hadisələri ilə əlaqədar Cinayət Məcəlləsinin 177.2.3-cü maddəsilə cinayət işi başlanıb, araşdırma aparılır.