Aktrisadan SƏRT SÖZLƏR: "Papağı ayaqaltına atıb, sonra da qeyrətdən danışırlar"

Aparıcı-aktrisa Könül Yusif qızı 8 Mart - Beynəlxalq Qadınlar Günündə Novruz adətindən danışıb. Avtosfer.az milli.az-a istinadən xəbər verir ki, hər zaman cəsarətli açıqlamaları ilə diqqət çəkən Könül bu dəfə "papaqatdı" adətinə görə gözünü yumub, ağzını açıb.

Aktrisa bu adətin mentalitetimizə "ləkə" olduğunu bildirib: "Novruz bizim ən gözəl bayramımızdır. Novruza qədər gedən çərşənbələr və Novruzun atributları var ki, bunları etmək mütləqdir. Amma indi durub qapıya papaq atırlar. Ay balam, bineyi qədimdən papaq namus-qeyrət rəmzidir. Harada görünüb ki, papağı onun-bunun qapısında ayaq altına atsınlar? Ötən əsrlərdə bir papağa görə adam öldürərdilər. At, arvad, papaq namus rəmzidir. At getdi, arvad getdi, barı papağı ayaqlar altına atmayın, ayıbdır e. Novruzda bacadan xurcun torba sallayardılar, papaq haradan çıxıb? Yaxşı, bildik, baca yoxdur qapı var. Amma qapıya torba atın da! Papağı onun-bunun qapısında ayaqaltına atıb, sonra da durub namusdan, qeyrətdən dəm vururlar, ayıbdır. Barı uşaqlara papaqatdını öyrətməyin, elə öyrətdiniz ki, bu gündəyik".